انا مصرى كنت زمان جندى وجتلك يا سينا اشوفك من جديد وطلت عليا ذكرياتى لما شوفت رملك وجبالك وشميت نسيمك السخن دخل صدرى بحب وخرج زفير ومعاه ذكرى ذكرى تحكى وتقول لاهلى وابنائى ولكل طفل عربى بيتولد ولكل شيخ سمع وكبّر يوم ما قلنا عبرنا واتالفت أغانى أولها بسم لله واولها بسم لله الله اكبر بسم لله وطلعت شادية تقول وتغنى عبرنا الهزيمة يا مصر يا عظيمة وانا لابس شدتى الكاملة وخوزتى وسلاحى معايا وواقف صف مع جنودك يامصر ورافع بصرى للسماء ونسورك تعدى علينا وازيزها يطربنا وبيقول ما تخافوش يا ولاد مصر انتم لها وشوفو بعيونكم انا هاعمل ايه فى عدوكم وراحت النسور تدك الحصون المنيعة واسمع صوت القنابل كأنها تحية فى يوم فرحى واشوفهاوهى نازلة كأنها ورد مفروط ينزل على كل دشمة افتخر بها عدوك وقال دى عايزة نووى كانت كل ورقة ورد تنزل تنفجر وتنور الوان واحنا نقول الله اكبر امتى هانعدى وجاء الامر اقتحــــــــــم طلعت الله اكبرعلقت سلاحى فى كتفى ووطيت انا وزملائى وشلنا القارب المطاط ونزلنا الساتر المصرى ولمست اقدمنا مية القناة الله اكبرنّزّلنا القارب فى المية وقفزنا عليه و بصيت حواليا الله عليكى يا قناة يا اللى حفرك أجدادى دا انتى بتاعتنا و ازاى نسيبك لعدونا الله اكبر كبارى و جسور بتتنصب و دبابات و عربيات و معدات بتقول يلاّ خلصوا الجسر عايزين نعدى عايزين ناخد بتارنا و نعرف عدونا مين هو المصرى لما يحارب ، بحارب بسلاحين اولهم الله اكبر و التانى كلاشنكوف ،عبرنا عدينا القناة اهلاًََََ يا خط برليف نار ودمار و دخان انا المصرى خير جنود الارض انا الدرع العربى خدنا سلاحنا و كانت قوة الله اكبر معانا طلعنا تانى مانع بنته إسرائيل امامنا طلع زميلى بسلم الحبل على ظهره كالوحش و فرد السلم من فوق على تحت و كان المانع عبارة عن تراب يشكل جبل ترابى مرتفع تغرث أقدامنا فيه و كان صعب طلوعه برؤية عدونا لكن تحت أقدامنا كان سلم المجد طلعت فوق و شوفت اول جندى إسرائيلى جاش صدرى بالحماس و لوحت لزملائى الله اكبر و أقدمت عليه كالوحش و قتلته و كذالك فعل زملائى فمنهم من يلقى بالقنابل و منهم من يقص السلك الشائك و منهم من يصوب سلاحه المضاد للدبابات و منهم من يزرع العلم و منهم من يزحف و من يتسلق و منهم من يطلق النار و منهم من يتصل بالقيادة هكذا كانت المعركة فى البداية عبرت قواتنا و استولت على خط برليف المنيع و الذى كان يطلق عليه اكبر مانع فى التاريخ فى ست ساعات و بدأنا بالزحف إلى داخل سيناء و تساقطت مواقع العدو فى ايدينا موقع موقع و فى اليوم الرابع من المعركة صدر امر لسريتنا بالتحرك بخطة معينة و هى قطع الإمدادات و التعزيزات عن عدونا و ذلك بالإستيلاء على ممر وسط الجبال و منع مرور اى امدادات او تعزيزات ، ركبنا المركبات و تحركنا بعد غروب الشمس وكان معنا قائدنا برتبة رائد و قال يلا يا رجاله هنعرفهم مين هما المصريين و تحركت بنا السيارات لمدة خمس ساعات و صدر الأمر بالترجل و حمل المعدات و الأسلحة و سرنا مسيرة ساعتين و توقفنا وشرح لنا القائد الموقع الذى سنهاجمه و الخطة و الغرض من الهجوم و توكلنا على الله و بدا لنا ضوء خافت من بعيد فى الظلام الحالك و عندما إقتربنا منه و قبل الانتشار حسب الخطة قال زميلا لى معروف عنه خفة الظل : يا فاندم هما عندهم جوافة و برتقال رد القائد عليه: بس ماعندهمش ميزان ، يلا يا رجالة كل واحد عارف هيعمل ايه و كان الإنتشار كالأتى كل خمس أفراد معاهم
حكمدار و كان فرد يحمل سلاح اربي جيه مضاد للدبابات و الثانى يحمل رشاش سويس معروغ عنه بقوة النيران و الثالث بندقية كلاشنكوف و يحمل خلف ظهره ثلاث طلقات اربى جيه كمساعد لحامل سلاح الاربي جيه و الرابع يحمل جهاز إشارة و انطلقنا على هيئة كماشة مجموعة من اليمين و مجموعة من اليسار ومجموعة من الوسط تعتبر قلب الهجوم و مجموعة استقرت فى مكانها و زحفنا علىبطننا لمدة نصف ساعة حتى وصلت كل مجموعة فى مكانها المخطط له فى هدوء تام و حاصرنا الموقع ، و كانت خطة بداية الهجوم هى إرباك العدو و ذلك بأن يطلق فرد من المجموعة التى استقرت فىمكانها قبل الانتشار قنابل صوتية و بعدها و فى نفس الثانية تطلق المجموعة الخلفية لموقع العدو قنابل صوتية وطلقات اربى جيه على مركبات العدو يخرج جنود العدو فى الاتجاهين نحو الصوتين لصد الهجوم وكان عنصر المفاجأة يليها سرعة التحرك و عدم استخدام اجهزة الاشارة الا بعد بدء الهجوم و تحقق هذا حينما تحركت قوات العدو نحو المجموعة التى استقرت فى مكانها و بدأت المجموعة الخلفية باطلاق النار توجهت قوات العدو مرة اخرى او جزء منها او نصفها فى اتجاه الاطلاق الثانى فبدا لهم ان القوات التى تهجم عليهم كانها جيش كامل و تشتت جنوده و نزلت المجموعتين التى فى اليمين و اليسار لاتمام الهجوم و كان فردين من المجموعتين خصصت لهم تدمير الوقود و مركبات العدو حتى لا يتثنى له الهروب و نضمن بقائه فى الموقع و القضاء عليه و دارت المعركة و تم تنفيذ الخطة بكلمة اقتحححمّ و تساقطت افراد العدو كالذباب و قد اصيب من مجموعة الاقتحام جنديين اصابات خفيفة و بدأ ضوء الفجر بظهور الخط الابيض و تكشف لنا الموقع و قد افترشت ارضه بجسس الاسرائليين ومنهم من يتأوى من إصابته و فجأة انطلق زميل لنا صعيدى الذى ينطق الجيم دال كالسهم فنادى عليه مساعد السرية :ارجع يا عسكرى و كأنه لم يسمع شىء و ظل يجرى ومعه سلاحه و بعد عشرين دقيقة رجع ومعه عسكرى اسرائيلى و هو يمسكه من لياقة سترته العسكرية بيد و فى اليد الاخرى سلاحه قال له القائد :ايه ده يا اسعد رد اسعد وقال :يا فاندم لمحته وهو بيتصنت علينا و ده عيب قام اتنين من زملائنا وتسلموا منه العسكرى الاسرائيلى الاسير و صوت اخر من بعيد يقصد العسكرى الاسرائيلى بصوت مرتفع و يسأله :شايلين الجوافة و البرتقال فين ياوله بلهجة اسكندرانية
ندى مساعد السرية إجمع وجاء القائدوشرح لنا احنا يارجالة اقتحمنا الموقع ده عشان نقطع الامدادات والتعزيزات للعدو اللى بيواجه قوتنا على القناة وإحنا هنعد هنا مدة 24 ساعة حسب الاوامر وهتيجى هوليكوبتر تخدنا من هنا يلا كل واحد ياخد موقعه واحصرو الذخيرة بتاعت العدو وشوفو التعيين (الطعام) واعملو حسابكم إن احنا ممكن نعد هنا إلى ماشاء الله يلا يارجالة واخدنا كل واحد موقعه على التلال المحيطة بالموقع وبنفس التقسيم مجموعات وعدى النهار وفى الليل سمعنا صوت ازيذ فى الصحراء وشعاع بعيد فى السماء اخرج فرد الاشارة جهاز اللاسلكى واتصل بالقائد يافندم احنا سمعين صوت عربيات وضوء من بعيد بس مش ظاهر وجاء صوت القائد يرد استعد كل فرد ياخد مكانه ومر الوقت وظهر ضوء مركبات العدو متجه نحونا ليمر من الممر وظللنا قابعين فى موقعنا وكانت الخطة ان نحصر مركبات العدو دبابات وسيارات داخل الممر ونصب عليهم نيراننا من الاعالى وظلت تتقدم السيارات حتى وصلت متقدمتها على اول الممر وتخطته فى اتجاهها الى نهايته ليجتازه واثناء مرورهم من الممر رأو اشلاء موقعهم فنزل فى قلوبهم الرعب فأسرعو خطاهم ليجتازو الممر عندما وصلت اول دبابة لهم عند نهاية الممر جاء الامر اضرب فأصيبت الدبابة الاولى والدبابة الاخيرة وحصرو وظل اطلاق النار على مركبات العدو المحصورة فى الممر واصابة المركبة تلو الاخرى وكان اطلاق النار عبارة عن طلقات ار بى جيه مضادات للدبابات وهاون من خلف السواتر ورشاش سويس وكلاشنكوف وقناصة وقنابل يدوية وتم بحمد الله القضاء عليهم تماما وكانت المفاجأة انه لم يصاب فرد واحد منا عندما نزلنا لتفقد طابور السيارات ويطلق عليه اسم كول وجدنا انه من بين السيارات باص(اتوبيس)به جثث جنود العدو كلهم رتب عائدين من داخل اسرائيل كانو فى جازات الى موقعهم على القناة وكان هذا بمثابة فرح وبهجه وكانت من بينهم رتبة مقدم ورائد ونقباء وكانت بداية الفرحة الله اكبروقال القائد دا مش اخر كول هيجى دلوقتى المركبات المدمرة دىتعتبر سدت الممر وهتريحنا شوية فى الدفاع عنه عشرة دقائق مرت الا وصوت ازيز طائرات العدو تحلق فوقنا وتقذفنا بجحيم من النيران وعون الله معنا كل منا دخل الى الخنادق التى كانت معدة لجنود العدو ظل قذف الطائرات نصف ساعة وذهبت
================================
المؤلف: والدى
البقية تأتى
البستانى راوى الزهور
نقاط : 17594 التقيم : 11
موضوع: رد: جـــنودك يـا مــصــر الأحد 12 أبريل - 9:59
يابن النيل
ابن النيل النهر العذب
نقاط : 17277 التقيم : 0
موضوع: رد: جـــنودك يـا مــصــر الأحد 12 أبريل - 11:51
تسلم ياكبيرنا وكبير البساتين
العطر القمرى تحت المجهر
نقاط : 17444 التقيم : 1
موضوع: رد: جـــنودك يـا مــصــر الأحد 12 أبريل - 12:08
مشكور ابن النيل تسلم ايدك ياابن مصر
ابن النيل النهر العذب
نقاط : 17277 التقيم : 0
موضوع: رد: جـــنودك يـا مــصــر الأحد 12 أبريل - 12:50
تسلمى يابنت البحر الابيض والبحر الاحمر
يارب الاقى سمك
تسلمى على مرورك الكريم
وعلى مجهودك العالى
حسين المصري امين البستان
نقاط : 18144 التقيم : 10
موضوع: الحمد لله الأحد 12 أبريل - 13:00
أنا في جيش مصري مهما نسمع أو يكون من فساد أبناء مصر قادرين أن يعملوا أي شئ ممكن يكون في الخيال وبصراحه أصعب جيش المصر ي بيطلع رجاله ياريت العرب يتعلموا يعملوا كدا ميكنوش بيشتروا معدات مش عارفين يستخدموها ما ننساش الجيش العراقي من أقوي الجيوش في العالم لكن الخيانه ربنا يحفظنا منها
موضوع: جـــنودك يـا مــصــر 
الأحد 12 أبريل - 9:39
